Ջավախահայ ակտիվիստ Վահագն Չախալյանի եղբորը՝ Արմեն Չախալյանին, այսօր վրացական դատարանը 2 ամսով կալանավորելու որոշում է կայացրել: Tert.am-ին այս մասին տեղեկացրեց Վահագն Չախալյանը և նշեց, որ դատարանը որևէ կերպ չի հիմնավորել իր որոշումը, պարզապես արել է այն, ինչ պահանջել է դատախազությունը:

«Պաշտպանվող կողմի այն առաջարկությունը, որ գրավի դիմաց բաց թողնեն, չբավարարվեց»,-ասաց նա:

Հիշեցնենք, որ հունիսի 28-ին ոստիկանությունը հատուկ ջոկատայինների և սև բերետավորների հետ ձերբակալել է ջավախահայ ակտիվիստ Վահագն Չախալյանի եղբայր Արմեն Չախալյանին: Արմեն Չախալյանը մեղադրվում է «Նինոծմինդայում տեղի ունեցած անկարգությունների կազմակերպման մեջ»:

Նա տեղեկացրեց, որ միջադեպի առնչությամբ ձերբակալված մյուս երեք անձինք ազատ են արձակվել: Մեր այն հարցին, թե դիտավորություն չի տեսնում այն բանի մեջ, որ բոլորին ազատ են արձակել, իսկ իր եղբորը կալանավորել, նա ասաց, որ ուրախ է մյուսների համար, սակայն իր համար միանշանակ է, որ իր եղբայրն անմեղ է և կապ չունի կատարվածի հետ:

«Կռվին սկզբից ներկա չի եղել, հետո գնացել է, բաժանել է կռիվը, ասել է, որ չկռվեն: Ոչ մեկը չի ասում, որ այդ մարդը իրեն խփել է»,-ասաց նա:

Վահագն Չախալյանը նշեց, որ կատարվածի մեջ ինքը միանշանակ քաղաքական ենթատեքստ է տեսնում, իսկ մնացածը՝ ժամանակի ընթացքում կբացահայտվի:

«Ոչ թե նոր իշխանություններն են անում, այլ Սաաակաշվիլու թափթփուկները դեռևս իրենց իշխանությունը չեն կորցրել Ջավախքում»,-ասաց նա:

Աղբյուրը`http://www.tert.am/am/news/2013/07/01/armen-chaxalyan/ 
                                                                                                       http://oratert.do.am