Պաշտոնական Բաքուն արձագանքել է Հայաստանի նախագահ Սերժ Սարգսյանի օրեր առաջ արած այն հայտարարությանը, թե «մոտ ապագայում հարավկովկասյան տարածաշրջանում ուժերի հարաբերակացությունը փոխվելու է. փորձագետներն ադրբեջանական անխուսափելի ֆիասկոյին սպասում են արդեն երկու-երեք տարուց»:

Ինչպես հաղորդում է ադրբեջանական «ԱՊԱ» պետական գործակալությունը, Ադրբեջանի ԱԳՆ մամուլի ծառայության ղեկավար Էլման Աբդուլաևը այսօր հայտարարել է, թե Ադրբեջանի վերաբերյալ Սերժ Սարգսյանի ելույթը «ոչինչ չասող էր և ամբոխահաճո»:

«Հետաքրքիր է, թե ի՞նչ փորձագետների կանխատեսումների հիման վրա է Սերժ Սարգսյանը նման հայտարարություն անում: Այն փորձագետների, որոնք նրանց երկիրը (Հայաստան) նման աղետալի վիճակի հասցրին,-ասել է Ադրբեջանի ԱԳՆ-ի պաշտոնական ներկայացուցիչը և ավելացրել,-Հայաստանի նախագահը, մոռանալով, որ իր երկիրը գտնվում է աղետալի վիճակում, նման պոպուլիստական (ամբոխահաճո) հայտարություն անում է մի երկրի վերաբերյալ, որը տարածաշրջանի առաջատարն է: Պաշտոնական Երևանի սահմանափակ մտածելակերպի պատճառով այդ երկիրը դուրս է մնացել տարածաշրջանի զարգացման գործընթացներից: Հավանաբար հենց այդ հանգամանքն է զայրացնում Հայաստանի նախագահին, որը չգիտի, թե ինչպես քավի իր մեղքերը հայ ժողովրդի առջև:

Հիշեցնենք, որ Սերժ Սարգսյանը Ադրբեջանի վերաբերյալ հայտարարությամբ  հանդես էր եկել  հունսի 5-ին, Ազգային անվտանգության խորհրդի նիստի ժամանակ:  Հայաստանի նախագահը, ի թիվս այլ հարցերի անդրադառնալով Ադրբեջանի հակահայկական քաղաքականությանը, մասնավորապես նշել էր՝ «Առաջնորդվելով դասական բռնապետության կանոններով՝ Ադրբեջանի իշխանությունները զբաղված են միայն սեփական ժողովրդին հայկական թշնամու կերպարի հրամցմամբ: Ադրբեջանում դրված հասարակական-քաղաքական և տնտեսական ականներն են սպառնում պայթել և պայթել շատ արագ ու կարծես՝ միաժամանակ.... Փորձագետներն ադրբեջանական անխուսափելի ֆիասկոյին արդեն երկու-երեք տարուց են սպասում:

Աղբյուրը` http://www.tert.am/am/news/2013/06/07/azeri-sargsyan/

http://oratert.do.am