Ամերիկացի իննամյա մի աշակերտուհի նախատել է McDonald's ընկերության ղեկավարին արագ սննդի ռեստորանների վնասակար ուտեստների համար և հարցրել գործարարին, թե ինչու է իր ընկերությունը խաբեության ճանապարհով ստիպում երեխաներին ուտել անառողջ սնունդ, հայտնում է Russia Today-ը։

Իննամյա Հաննա Ռոբերթսոնը ելույթ է ունեցել McDonald's–ի բաժնետերերի ամենամյա ժողովի ժամանակ։ Հանդիպմանն աղջիկը եկել է իր մայրիկի հետ, ով «Ես այսօր ծիածան եմ կերել» (Today I Ate a Rainbow) ինտերակտիվ խաղի մշակողն է, որը կոչված է օգնել երեխաներին առողջ սնվելու հարցում։

«Չեմ կարծում, որ դա արդարացի է, երբ խոշոր ընկերությունները փորձում են խաբել երեխաներին և ստիպել նրանց ընդունել անառողջ սնունդ՝ օգտագործելով խաղալիքներ և մուլտֆիլմերի հերոսներ։ Դա արդարացի չէ, քանի որ իմ հասակակից և ինձանից փոքր շատ երեխաներ տառապում են այնպիսի լուրջ հիվանդություններով, ինչպիսին է շաքարախտը և ճարպակալումը»,- ասել է աղջիկը։

Վերջացնելով իր ելույթը՝ Հաննան տվել է իր գլխավոր հարցը՝ «Պարոն Թոմփսոն, մի՞թե Դուք չեք ցանկանում, որ երեխաները լինեն առողջ և կարողանան երկար և առողջ կյանք ապրել», ինչին Թոմփսոնը պատասխանել է, որ իր ընկերությունը անառողջ սնունդ չի վաճառում, իսկ իր սեփական երեխաները նույնպես սնվում են McDonald's-ի արտադրանքով։ Սակայն նա ավելացրել է, որ լավ առողջության համար պետք է շատ մրգեր ուտել։

Աղբյուրը` http://www.tert.am/am/news/2013/05/25/9-years-old-girl/

http://oratert.do.am