Գյուղատնտեսության ոլորտում երկրորդ տարին անընդմեջ արձանագրում ենք աճի բարձր տեմպեր, որը 2012-ին կազմել է 9.5 % և 1.9 %-ով նպաստել է ընդհանուր տնտեսական աճի ցուցանիշին։ Այս մասին ՀՀ վարչապետ Տիգրան Սարգսյանն ասաց «ՀՀ 2012թ. պետական բյուջեի կատարման մասին» տարեկան հաշվետվության ժամանակ։

Ըստ վարչապետի՝ գյուղատնտեսության ճյուղը կրել է կառավարության կողմից նախատեսված գյուղատնտեսության և, հատկապես, բուսաբուծության խթանմանն ուղղված ծրագրերի, ինչպես նաև բարենպաստ բնակլիմայական պայմանների ազդեցությունը։

«Կառավարությունը 2011-ին ձեռնարկեց մի շարք ծրագրեր, օրինակ՝ վարկերի տոկոսադրույքների լայնածավալ սուբսիդավորման ծրագիրը, որի արդյունքում միայն 2012-ին տրամադրվել է 14 760 մլն դրամի վարկային միջոց և շնորհիվ պետբյուջեից հատկացված 568 մլն դրամ սուբսիդավորման, վարկերը տրամադրվել են շուկայականից էապես ցածր՝ 8-10% տոկոսադրույքով»,- ասաց նա։

Բացի այդ, ըստ վարչապետի՝ գյուղացիական տնտեսություններին արտոնյալ գներով պարարտանյութ է տրվել։ Պարարտանյութի համար 2012-ին 1 մլրդ 433 մլն սուբսիդիա է տրամադրվել, որի արդյունքում գյուղացիներին 6000 դրամով 1000 տոննա ազոտական պարարտանյութ է հատկացվել ։

«Վառելիքի սուբսիդավորման համար տրամադրվել է 1 մլրդ 948 մլն դրամ, ինչի արդյունքում գյուղացիական տնտեսություններին լիտրը 50 դրամով 21 մլն 648 հազ լիտր դիզվառելիք է հատկացվել։ Ցորենի և գարու սերմնարտադրության ծրագիրը, որի միջոցով 7 400 շահառուի հատկացվել է 3 400 տոննա սերմնացու։ Ծրագրի իրականացման արդյունքում 2012-ին ցորենի ցանքերի քանակն ավելացել է 17 000 հա-ով»,- արձանագրեց վարչապետը։

Աշնանացան ցորենի համախառն բերքը 2011-ին կազմել է 211 հազար տոննա, 2012-ին՝ 234 հազար տոննա։

Հաջորդը տոհմային երինջների ներկրման ծրագիրն է, որի արդյունքում ըստ վարչապետի՝ 466 մլն դրամով Հայաստանի Հանրապետություն է ներկրվել 485 գլուխ տոհմային բարձր արտադրողականության երինջ և բաշխվել 24 տնտեսվարող սուբյեկտների։

Բուսաբուծության համախառն իրական աճը, ըստ կառավարության ղեկավարի՝ կազմել է 14%։ «Պետք է փաստել, որ գյուղատնտեսության մասնաբաժինը ՀՆԱ-ի ներքին արդյունքում միջճգնաժամային տարվա՝ 2008-ի 16.3 %-ի դիմաց 2012-ին կազմել է 19%»,- եզրափակեց նա։

Աղբյուրը`http://www.tert.am/am/news/2013/05/29/annual-report/ 

http://oratert.do.am