Հեղինակավոր Bloomberg-ում հրապարակվել է հայտնի տնտեսագետ Անդերս Ասլունդի ուշագրավ հոդվածը ռուսական <<Գազպրոմ>> ընկերության մասին։ Հոդվածը թարգմանաբար ներկայացրել է նաև InoPressa կայքը։

Աշխարհի որևէ այլ խոշոր ընկերություն այսքան տպավորիչ վատ չեն ղեկավարում, որքան ռուսական <<Գազպրոմը>>- այսպես է սկսում իր հոդվածը տնտեսագետը, ում կարծիքով՝ անցած 10 տարիների ընթացքում ռուսական ընկերության մենեջմենթը թույլ է տվել բոլոր սխալները։

Այնուհանդերձ, նախագահ Վլադիմիր Պուտինը հերքում է «Գազպրոմում եղած ճգնաժամի փաստը և մշտապես աջակցում ընկերության կառավարման նախագահ Ալեքսեյ Միլլերին,- շարունակում է հոդվածագիրը՝ նկատելով, որ <<Գազպրոմի>> ծանր դրությունը լուրջ հարց է ոչ միայն այն առումով, որ կապիտալիզացիայի տեսանկյունից այն Ռուսաստանի խոշորագույն ընկերությունն է, այլ նաև այն պատճառով, որ Պուտինը դրա իրական ղեկավարն է։

Որ ուղղությամբ ,որ գնում է <<Գազպրոմը>>  այդտեղ էլ գնում են և՛ Ռուսաստանը, և՛ պուտինյան կառավարությունը,-պնդում է Ասլունդը։

<<Գազպրոմի>> կապիտալիզացիան ընկել է 369 մլրդ դոլարից 83 մլրդ-ի, և անկման միտումը շարունակվում է։ Ընկերությունն այլևս վստահություն չի ներշնչում բաժնետերերի մոտ։

Սակայն որո՞նք են «Գազպրոմի վատ կառավարման պատճառները.

Ծայրահեղ իներտությունը, նոր ինֆորմացիան «ներծծելու ցանկության բացակայությունը, կոռուպցիան և գոռոզամտությունը։ Եթե Գազպրոմը գտնում է, որ սպառողներն իրենց «վատ են պահում, ապա դադարեցնում է գազի մատակարարումը։ Արդյունքում սպառողները փորձում են նվազեցնել «Գազպրոմից ունեցած կախումը։

Անցած տասնամյակի ընթացքում ռուսական ընկերությունը գազային արդյունաբերության մեջ 3 խոշոր հեղափոխություն է բաց թողել. ԱՄՆ-ում թերթաքարային գազի արդյունահանման ծավալների ավելացում, հեղուկ գազի համաշխարհային բում և Չինաստանում պահանջարկի ավելացում։ Բացի այդ, Գազպրոմի» մենեջմենթը չհասկացավ Եվրոպական Միության կարևորությունը,-շարունակում է տնտեսագետը՝ հիշեցնելով Եվրոպական հանձնաժողովի կողմից ընկերության դեմ սկսված հետաքննությունն ու խոշոր տուգանքը։

Գազպրոմի բաժնեմասը եվրոպական շուկայում ընկել է մինչև 34% (2011թ.), իսկ ռուսական շուկայում՝ մինչև 65% (2012թ.)։ Սակայն ամենից շատ ընկերության վաճառքի ծավալները նվազում են նախկին ԽՍՀՄ երկրներում, քանի որ այդ երկրներում այն գործում է առավել կոպիտ ու քաղաքականացված մեթոդներով,- պնդում է Ասլունդը։

Այս ամենը, ըստ նրա, վկայում է Գազպրոմի ոչ կոմպետենտության մասին, սակայն բաժնետերերին իրականում վրդովվեցնում են այլ բաներ՝ վիթխարի ծախսերն ու ընկերությունում տիրող կոռուպցիան։ <<Սբերբանկի>> վերլուծաբանները հաշվարկել են, որ գազի արդյունահանման համար Գազպրոմին տարեկան 11 մլրդ դոլար է անհրաժեշտ, մինչդեռ  2011թ. կապիտալ ծախսերը գերազանցել են 53 մլրդ դոլարի շեմը, իսկ 2012թ. կազմել 43.2 մլրդ դոլար։ Մոսկովյան վերլուծաբանների կարծիքով՝ չափից ավելի մեծ ծախսերի 2/3-րդ մասը բացատրվում է կոռուպցիայով, իսկ մնացածն էլ՝ շվայտ ներդրումներով,- գրում է նա։

Իսկ Պուտինը կապիտալ ծախսերի կրճատման փոխարեն առաջարկում է էլ ավելի թանկ նախագծեր։

Առաջիկա տարիներին Գազպրոմի և նավթային հատվածի ներդրումը Ռուսաստանի պետբյուջե, ըստ ամենայնի, կտրուկ կնվազի, ինչն էլ կստիպի Կրեմլին վերանայել տնտեսական ուղեգիծը,-եզրափակում է Ասլունդը՝ այս իրավիճակում տեսնելով նաև դրական կողմեր.«Չափից ավելի կոռումպացված դառնալով ՝ Գազպրոմը ինքն իրեն կործանեց։ Նրան այևս չի հաջողվի իշխող դիրք ունենալ Ռուսաստանի քաղաքական կյանքում, և երկիրը մասամբ կդադարի նավթային տերություն լինել։

Աղբյուրը` http://www.tert.am/am/news/2013/06/10/gazprom-putin/ 

                                                                                                http://oratert.do.am