10:26 Եթե Լիսկան ՀՀԿ-ին սպաներ | |
 Սյունիքի մարզպետ Լիսկայի հերթական քաջագործության մասին ՀՀԿ-ականները լռում են. նրանք կամ ոչինչ չեն ասում, կամ առավելագույնը փորձում են արդարացնել: Լռություն, թե արդարացում դիլեմայի հանգուցալուծումը յուրաքանչյուր ՀՀԿ-ականի դեպքում կախված է մեղսունակության աստիճանից: Եթե այն կա՝ լռություն է, իսկ եթե չկա, ապա տարաբնույթ բառաշարքերով փորձում են ինչ-որ կերպով արդարացնել Լիսկային, իհարկե` տողատակերում: Առայժմ նրան բացահայտորեն արդարացնելու համարձակությունը կամ անմեղսունակությունը դեռ չի բավականացնում: Սակայն կասկած չկա, որ դա դեռ առջևում է: Իրականում, սակայն, այս իրավիճակում խնդիրը Լիսկայից վաղուց արդեն տեղափոխվել է ավելի լայն հարթություն, որում անկասկած մեծ տեղ է զբաղեցնում նրա, այսպես ասած, հարազատ կուսակցությունը՝ ՀՀԿ-ն: Լիսկայի ճակատագրի հարցը, փաստորեն, ՀՀԿ-ի նկարագրի հարցն է, և եթե Սյունիքի մարզպետը հերթական անգամ խուսափեց պատասխանատվությունից, ապա դա, ըստ էության, լինելու է ՀՀԿ-ի դեմքի հերթական արտացոլում և ի վերջո ստացվելու է, որ Լիսկան սպանեց նաև ՀՀԿ-ին: Եվ եթե մարդկային կյանքի ողբերգական վախճանը չլիներ, ապա Լիսկային այդ մի սպանության՝ ՀՀԿ-ին բարոյապես հերթական անգամ սպանելու համար իսկապես արժեր պարգևատրել նույնիսկ ազգային հերոսի կոչումով: Եթե լուրջ, ապա այսօր Լիսկայի հրեշավոր կերպարի կողքին հասարակությունը պարտավոր է հերթական անգամ տեսնել իշխանական համակարգի և մասնավորապես Հայաստանի հանրապետական կուսակցություն կոչվող կառույցի հրեշավոր կերպը, որը դարձել է տարաբնույթ հանցագործների հանգրվան, որտեղ նրանք իրենց կատարած հանցանքների դիմաց ստանում են արդարացումներ, կոչումներ, ապահովություն, անվտանգության երաշխիքներ: Եվ այս ամենը պետության ապագայի, պետական անվտանգության, ժողովրդագրական աղետի հաշվին: Սա է իրական աղետը, իսկ լիսկաները այս աղետի հետևանքն են ընդամենը: Եթե պատճառը, այսինքն` ՀՀԿ-ն շարունակում է մնալ և լինել իշխող, հետևանքների վերացումը կկրի ժամանակավոր բնույթ: Բավական էր լսել Գալուստ Սահակյանի նախօրեի հեռուստամտքերը` համոզվելու համար, որ եթե թեկուզ մի գլխում այդպիսիք կան, և այդ գլուխը իշխանության մեջ է, ապա Հայաստանում անպատիժ հանցագործներ կլինեն միշտ: Իսկ այդ գլուխն իշխանության մեջ է, ընդ որում` բոլորովին ոչ միայնակ: Մուսա Միքայելյան Աղբյուրը`http://www.1in.am/arm/armenia_analysis_189038.html http://oratert.do.am | |
|
| |
| Մեկնաբանություններն ընդամենը՝: 0 | |
