Այսօր USAID-ի ժողովրդավարական ներգրավվածության կենտրոնի նախաձեռնությամբ տեղի ունեցավ զեկույց, այսպես կոչված, «Թուրք մեսխեթցիների» վերաբնակեցման թեմայով: Տվյալ հարցի շուրջ զեկուցման համար ժողովրդավարական ներգրավվածության կենտրոնը հրավիրել էր Ախալցխայում գործող «Տոլերանտ» կազմակերպության անդամներին, ովքեր վերջին տարիների ընթացքում մշտապես զբաղվել են թուրք-մեսխեթցիների թեմայով: Այս մասին տեղեկացնում է akhaltskha.net-ը։
«Տոլերանտ» կազմակերպության ղեկավար Ցիրա Մեսխիշվիլիի խոսքերով` իրենց կազմակերպությունը մշտապես օգնել է թուրք-մեսխեթցիներին վերաբնակեցման ընթացքում առաջացած խնդիրների շուրջ: Կազմակերպությունը մշտապես հետևել է նրանց իրավունքների պաշտպանությանը: Վրաստանում, Ադրբեջանում ու Թուրքիայում իրականացրել է մի շարք տարբեր ծրագրեր: Ցիրա Մեսխիշվիլիի խոսքերով` այսօր Ախալցխայի շրջանում ապրում է 22 թուրք-մեսխեթցիների ընտանիք, որոնցից շատերը երկար տարիներ չէին կարող ստանալ Վրաստանի քաղաքացիություն, քանզի նրանցից շատերը ցանկություն չունեին հրաժարվելու այլ երկրների քաղաքացիներ լինելուց: Այսօր տվյալ 22 ընտանիքներից միայն 82-ն են Ախալցխայի շրջանում ստացել Վրաստանի քաղաքացիություն:
Թուրք-մեսխեթցիներ կան նաև Աբասթումանի, Ադիգենի շրջաններում, ինչպես նաև Վրաստանի այլ քաղաքներում: Ներկայումս իրենց վերադարձի ցանկություն են հայտնել 1 053 Ադրբեջանի թուրք-մեսխեթցիներ և վերադառնալ ցանկացողներ մինչ օրս գրանցվում են:
Այս ամենի հետ մեկտեղ Ցիրա Մեսխիշվիլին նշեց, որ դժվար թե մեծ թվով վերադարձողներ լինեն, քանզի նրանցից շատերը ապահով ապրում են այլ երկրներում, իսկ գալով Վրաստան նրանք պետք է սկսեն զրոյից:
Նա նաև թուրք-մեսխեթցիներին ներկայացրեց որպես մահմեդականացած վրացիների, ովքեր ցանկություն ունեն սովորել վրացերեն և վերականգնել իրենց վրացական ազգանունները: «Ախալցխայում բնակվող մահմեդական մեսխեթցիների երեխաները այսօր սովորում են վրացական դպրոցներում: Նրանք սովորում են վրաց լեզուն և պատմությունը: Արտերկրներում բնակվողների մեջ ևս կան շատերը, ովքեր սովորում են վրաց լեզուն»,- նշեց Ցիրա Մեսխիշվիլին:
Աղբյուրը`http://www.tert.am/am/news/2013/05/29/meskhetci/
http://oratert.do.am
|