17:17 Ադրբեջանի ՆԳ նախկին նախարարը ձերբակալվել է. նախօրեին նա իշխանության ներկայացուցիչներին մարմնավաճառ էր անվանել | |
Ադրբեջանի ներքին գործերի նախկին նախարար Իսքանդեր Համիդովը (պաշտոնավարել է նախագահ Աբուլֆազ Էլչիբեյի (1992-1993թթ) նախագահության օրոք՝ 1992-1993թթ-ին-Tert.am) ձերբակալվել է:
Ինչպես հաղորդում է ադրբեջանական Haqqin.az կայքը, նախկին պաշտոնյան ձերբակալվել է այսօր կեսօրին. ականատեսները պատմել են, որ իրավապահները ոլորել են նրա ձեռքերը, գցել գետնին, ձեռնաշղթա հագցրել, ապա նստեցրել են ավտոմեքենան ու տարել անհայտ ուղղությամբ:
Թե ինչու են ձերբակալել նախկին պաշտոնյային, հայտնի չէ: Haqqin.az-ը, սակայն, կարծիք է հայտնում, որ պատճառը նախօրեին իշխանությունների հասցեին Համիդովի հնչեցրած սուր քննադատությունն է:
Հիշեցնենք, որ Համիդովը երեկ ելույթ էր ունեցել Ադրբեջանի ընդդիմության հանրահավաքի ժամանակ և ընդդիմադիրներին արմատական քայլերի դիմելու կոչ արել:
«Այս իշխանություններն ինքնակամ չեն հեռանալու,-«զգուշացրել է» Համիդովը, այնուհետ իշխանության ներկայացուցիչներին մարմնավաճառ անվանել: «Սա մարմնավաճառների կառավարություն է,-ասել էր նա:- Նրանք անարժաններին Պատվո շքանանշան են շնորհում, անփառունակներին՝ Փառքի շքանշան, մարմնավաճառներին՝ Ժողովրդական արտիստի կոչում»:
Համիդովը 1995թ-ին 14 տարվա ազատարզրկման էր դատապարտվել՝ պետական միջոցները յուրացնելու և պաշտոնեական լիազորությունները վերազանցելու մեղադրանքով: Ադրբեջանի նախագահ Իլհամ Ալիևը 2005թ-ին նրան ներում էր շնորհել: 2008թ-ին նախկին իշխանավորը լքել էր Ազգային-ժողովրդավարական կուսակցության նախագահի պաշտոնը և այդ ժամանակից ի վեր քաղաքական ակտիվ գործունեությամբ չէր զբաղվում: | |
|
Մեկնաբանություններն ընդամենը՝: 0 | |